نامياري سياسي دانشور Philip Bobbitt (فلپ بابي) پنهنجي ڪتاب The Shield of Achilles ۾ چيو آهي، ته فوجي ۽ آئيني طريقن ۾ مطابقت ۽ موافقت جي ذريعي رياست جو آئيني سرشتو تبديل ٿي وڃي ٿو. سندس خيال موجب، قديم دور جي جنگين جي نتيجي ۾ مخصوص آئيني ڍانچا نروار ٿيا، ڇاڪاڻ جو آئيني سرشتو پنهنجي دور ۾ ٿيل آئيني ۽ فوجي ايجادن جي مُناسب استعمال سان اهميت حاصل ڪري ٿو. اهي امن معاهدا جن وڏين جنگين جو خاتمو آندو، تن آخرڪار رياستي معاشري ۾ آئيني نظامن کي متعارف ڪرايو ۽ هر آئيني نظام منفرد قسم جي حقيقي ۽ قانوني بُنيادن کي جنم ڏئي ٿو. هي نظريو قومن جي لاڳاپن، انهن ۾ تبديلين ۽ عالمي نظام جي اوسر بابت بهتر طريقي سان وضاحتون ڏئي ٿو ۽ ”نيوريئلزم“ جي ان موقف کي رد ڪري ٿو، ته هر رياست ”طاقت جو توازن“ واري اصول ذريعي، پنهنجو وجود قائم رکڻ لاءِ فقط قومي مُفادن کي اهميت ڏئي ٿي.